Hachhek Farmers Tour Flag Off na hi nimin khan Vanapa Hall-ah neih niin Capt HS Lalawmpuia Dawrpui Corps Commanding Officer in a nei a. Lalpekkima,PA to Hachhek MLA in report tawi pein Hachhek Farmers te zinna tur atan hian Hachhek bialtu MLA in Agriculture Ministry ah rawtna a thlen a. Dan angin Mizoram Horticulture Deptt in forward in Agriculture Ministry in Rs 3,92,000 an phalsak.

Bialtu MLA in a bial te hi thlawhna ngeiin an kal lam chu kal se a tih avangin thlawhna ticket man zawng zawng Rs 5,06,000 bakah tuldang atan 100,000 a tum a. NECS in t-shirts leh he tour a tul dangte a sponsor ve bawk tih a tarlang bawk.

New Delhi a kal ve Hachhek MLA Robert Romawia Royte chuan a bial huan siamtu te'n central sorkar leh Mizoram Horticulture department  duhsakna changa Delhi leh a chhehvel an fang thei chu lawmawm a tih thu a sawi a. An hlawkpui ngei a rin thu a sawi bawk.

Hachhek Delhi zin te hian vawiin hian Qutub Minar, Lotus Temple, Red Fort, Parliamment, India Gate leh hmun pawimawh dangte Tour Guide kaihhruaina hnuaiah an fang kual a ni. Naktuk lamah chhunzawmin zanah 'Hachhek Nite' hlimawm tak Hachhek bial MLA nupui Lalrampari’n a host dawn a, zaithiam TBC Zaithanpuia leh midangte an tel ang a, central ministry a senior official-te pawh 'Hachhek Nite' ah hian tel tura beisei an ni.

He team a asst leader Kanan Lalhlimawma, Rengdil, Hachhek bial kuhva chingtu pawl President chuan, " Bialtu MLA in Hachhek bial kuthnathawktute duhsaka  farmers tour a neihpui chu lawmawm an tih thu sawiin kumina MLA fund hmanga kuhva chi nuai 1 mirethei ten an phun pawh a nung tha hlawm niin kan hria a, a lawmawm hle a ni" a ti.